Davíð er starfsins verður

Davíð er starfsins verður, hann hefur kjark til að taka óvinsælar ákvarðanir og þor til að ganga gegn straumnum.

Hann lætur ekki getulausa atvinnustjórnmálamenn í vinsældakosningum, komast upp með að nota sig sem blóraböggul.

Fólk verður að nota höfuðið aðeins.

Trúir einhver því að einn af 3 Seðlabankastjórunum sé ábyrgur fyrir öllum ákvörðunum bankans, og að enginn hinna fjölmörgu starfsmanna komi að ákvörðunum.

Trúir einhver því að Bankaráð Seðlabankans sé sofandi á bak við luktar dyr, á meðan Davíð taki allar ákvarðanir og stjórni einn Seðlabanka Íslands.

Halldór Blöndal, Jón Sigurðsson, Erna Gísladóttir, Ragnar Arnalds, Hannes Hólmsteinn, Jónas Hallgrímsson og Valgerður Bjarnadóttir eru aðalmenn í bankaráði.

Halla Tómasdóttir, Birgir Þór Runólfsson, Tryggvi Friðjónsson, Sigríður Finsen, Guðný Hrund Karlsdóttir, Ingibjörg Ingvadóttir og Guðmundur Örn Jónsson eru varamenn bankaráðs.

Í bankanum eru 8 svið, ásamt sviðsstjórum og starfsmönnum, auk fjölda sérfræðinga.

Heldur fólk virkilega að einstaklingurinn Davíð Oddsson sé svo valdamikill, að allir starfsmenn bankans og hans yfirmenn hoppi eftir geðþótta Davíðs.

Er fólk virkilega svona auðtrúa á áróður fyrir greindarskerta, gleypir fólk við hráum áróðrinum um vonda manninn í Seðlabankanum, frá þeim sem eru að bjarga eigin skinni.

Er það ekki Alþingis að setja samfélaginu reglur til að starfa innan, var það ekki það fólk sem var of upptekið við að útdeila sjálfu sér og flokkunum, sjálftökurétt úr fjárhirslum þjóðarinnar, til að hafa tíma til að setja bankakerfinu reglur, eða of upptekið við að skjalla útrásarvíkingana.

Það hefur enginn sannað lögbrot á þessa menn sem settu landið í skuldapytt, þeir virðast hafa starfað innan þess lagaramma sem settur var.

Eða eigum við að segja frekar, sem ekki var settur.

Aldrei kaus ég Davíð Oddsson og hans er þjóðar skömmin vegna Íraks, en maðurinn er samt að vaxa að mínu áliti, og ef hann býður sig fram sem Forseti Íslands, er ég til í að hugsa málið.

Davíð ber fyrir sig bankaleynd

Meira grín

Miklir grínarar þau Solla og Geir, nú er verið að tala um launalækkun, var síðasta grín ekki afturköllun eftirlauna.

Voða gaman hjá þeim að grínast í vitleysingunum, álíta okkur greinilega greindarskert, en kannski er eitthvað til  í því, fólk kaus víst þessa stjórnmálamenn á þing.

 

Kjararáð getur ekki lækkað launin

Var einhver að panta könnun

Já góðan dag

Var einhver hjá ykkur að panta könnun, hvaða útkomu má bjóða þér. 

Sum þjónustufyrirtæki eru bara fyndin. 

Aukin ánægja með störf ráðherra

Spurning um dreifingu sýkinga

Spurning er í huga mér um dreifingu sýkingar, í landi eru settar upp sauðfjárveiki girðingar til að hindra útbreiðslu sjúkdóma, en hvað er gert til sjós?

Getur verið að síldveiðiflotinn sé sjálfur að dreifa sýkingu með því að nota sömu veiðafærin á öllum veiðisvæðum, er hætta á að verið sé að dreifa sýkingu um allt, með notkun á veiðarfærum sem voru líka notuð á sýktum svæðum við Noreg.

Ég hef ekki næga þekkingu til að geta fullyrt þetta en miðað við það hvernig útgerðarmenn hafa hagað sér á Íslandsmiðum í gegn um tíðina, kæmi mér það ekki á óvart að stundargræðgin réði ferð, sama græðgin og viðheldur frákasti undirmáls afla, sama græðgin og ýtti undir sléttun kóralsvæða á sýnum tíma, sama græðgin sem er nánast búin að leggja fiskimiðinn í rúst til frambúðar.

 

Fundur vegna síldarsýkingar

Kjaftæði erlendra sérfræðinga

Voðalega er leiðinlegt að lesa þetta kjaftæði, það vita allir hver óvinurinn er og hvert vandamálið er.

Ríkisstjórn Íslands er ekkert nema hrokinn og getuleysið, þetta fólk er að fullyrða að aðeins þau geti bjargað klúðrinu sem þau sköpuðu sjálf.

Samfélagið er fullt af fólki sem er miklu hæfara til að leysa vandann en núverandi hrokagikkir í Ráðherraembættum, sem krefjast virðingar vegna stöðu sinnar, virðingar sem ekki hefur verið til unnið.

 Ríkisstjórnin ætlar sér að sitja áfram og mun beita sérsveitinni ef allt annað þrýtur, hegðuninni er sú sama í öðrum einræðisríkjum sem stjórnað er af hagsmunaklíkum, sem beita öllum ráðum til að halda völdum og tryggja aðgang að sameiginlegum fjármunum þjóðarinnar.

 Í gegn um árin hefur flokksmönnum, vinum og ættingjum verið komið fyrir í nánast öllum helstu embættum Ríkisins, þeir sem ekki bugta sig fyrir stjórnmálastéttinni án efa eru flæmdir úr embættum, og útkoman er embættismannakerfi jábræðra og systra sem eru sem viljalaus verkfæri stjórnmálamanna, og má þar nefna beitingu lögreglu gegn friðsömum Falun Gong meðlimum og öðrum friðsömum mótmælendum, eftir síma pöntunum frá ráðherrum.

Á Alþingi sitja þingmenn sem væla yfir eigin getu og ráðaleysi, svo lengi sem flokkseigendur og flokksvélar þeirra geta alið upp og valið einstaklinga í stjórnmálastéttina, er Alþingi er sem lambakró fyrir heimalninga flokksfélagana, þar sem þingmenn bíða eftir pöntunum frá Framkvæmdavaldinu á lögum sem það vill fá samþykkt.

Alþingismennirnir sem við kusum til að setja samfélaginu reglur, bíða eftir að Ráðherrarnir og embættismennirnir leggi fram lagafrumvörp til samþykktar, og í krafti meirihluta hundshlíðina alþingismanna sem flokksfélöginn hafa valið er forgangur á málum meirihlutans tryggður, þeir fáu þingmenn sem leggja sjálfir fram mál eru settir aftast í röðina til að tryggja að málinn dagi uppi, og ef einhver dirfist til að fylgja ekki röðinni, er stjórnarandstaðan strax farinn að tala um að ríkisstjórnin tali ekki einni röddu, svona eins og til að benda á að einhver er orðin líklegur til óhlýðni.

Valdagræðgi ráðherra sem flokkfélögin hafa valið er auðskilinn, þegar sameiginlegir hagsmunir þeirra, viðskiptafélaganna og flokkseigenda eru dregnir upp á yfirborðið, eins er með getuleysi þingmanna sem eru í starfsþjálfun fyrir hugsanlegt ráðherraembætti framtíðarinnar, hundsleg hlýðni þeirra við flokksfélöginn og sýnilegur óttinn við flokksvaldið er það sem ræður þeirra framtíð.

Ég er eiginlega að vera kominn á þá skoðun að sökum þess hvað spillingin er orðin mikið niðurgrafinn í rætur og undirstöður samfélagsins, sé eina leiði til að ráðast að rótum vandans, sú að endurnýja allan mannskapinn á Alþingi, gera Alþingi af hinum raunverulega handhafa löggjafavaldsins aftur, með því að taka áður framseld völd til baka.

Henda út siðareglum sem gera Alþingi af lélegri eftiröpun af Breskum karlaklúbb, og gera að vinnustað sem krefst agaðra og markvissra vinnubragða, þar sem þingmenn fá sitt sumarfrí eins og aðrir starfsmenn á vinnumarkaði, en vinnustaðnum Alþingi sé ekki lokað á meðan, þingmenn hafa hvort sem er varamenn til að leysa sig af í veikindum og sumarleifum.

Svo getum við farið að laga reglurnar og löginn sem eiga að tryggja heiðarlegt, gegnsætt, rekjanlegt og opið stjórnvald, sem setur hagsmuni samfélagsins ofar hagsmunum flokksfélaga og eigenda þeirra, samfélags sem tryggir einstaklingum framboðsrétt án forvals flokkseigenda.

Bæði Ráðherrum og þingmönnum þessa lands, er hollt að muna þá staðreynd að kirkjugarðar heimsins eru fullir af ómissandi fólki.

 Mér finnst sorglegt að skrifa svona pistil á fullveldisdeginum 1 Desember, áratugum eftir að við stofnendur Bandalags Jafnaðarmanna, börðumst við sömu draugana og héldum uppi sömu gagnrýni.

Íslendingar einblína á vandann

Glæsilegt

Og tromp bók hjá Sparisjóð ber 11% vexti í næstum 18% verðbólgu, þ.e.a.s ef þú hreifir innistæðuna ekki innan mánaðar.

Ef þú tekur út falla vextirnir niður í 8,35%.

Sniðugt að spara á Íslandi.

Verðbólgan nú 17,1%

Gott mál

Það er kannski ekki líklegt til vinsælda að tala jákvætt um þetta, en mér er alveg sama um vinsældir.

Að auka við framleiðslugetu álversins er bara gott, þetta er gert án þess að fara inn á ný svæði til að koma fyrir álveri með tilheyrandi raflínum, og eykur á útflutninginn sem okkur bráð vantar að bæta í.

Að vísu er álverð fallandi og verður líklega lágt um töluverðan tíma, sem kemur sér illa fyrir Landsvirkjun, sem er með samninga um raforkusölu tengda álverðinu, en það er víst samt ekki svo að verðið geti farið neðar en ákveðin föst lágmarkstala sem er í viðkomandi samningum, og ég geng út frá því að lánin fyrir virkjununum séu í sömu minnt og tekjurnar.

Við njótum hluta ál gróðans í uppsveiflum en erum tryggð fyrir verðhruni, það hefði nú verið gott að hafa svona reglu og skattaramma um bankakerfið.

Staðsetning virkjana og stíflumannvirkja er eitthvað sem alltaf er deilt um, því staðsetning er oftast nær tilfinninga tengd og röksemdarfærslan gegn virkjunum líka.

Hægt er að hjakka endalaust í þessu gamla deilufari um virkjanakosti og forgangsröðun, en er ekki ráð að fara að setja upp áætlun til næstu 50 ára eða svo, og kynna hana á sérstökum virkjanavef, þar sem hægt er að gefa fólki kost á að tjá sig um virkjanakosti, og raða þeim niður eftir ásættanleika með stigagjöf.

Þannig tel ég að hægt sé að nálgast sættir á sjónarmiðum allra aðila með markvissum hætti, í stað upphlaupa á síðustu stundu og storma í vatnsglösum.

Samningar við Rio Tinto Alcan á lokastigi

Ólögleg handtaka er lögbrot

Er þá ekki ráð að sækja þann sem fyrirskipaði handtökuna til saka og vísa úr starfi, er það ekki gert við þá sem brjóta lög, og eru ekki allir jafnir fyrir lögum.

Það virðist vera full þörf á að fjarlægja einhverja þá innanhúss í lögreglunni, sem ítrekað efna til illdeilna við almenning, og að því er virðist til þess eins að geta réttlætt tilvist sérsveitar sem búið er að koma upp til að berja á mótmælendum og verja ráðmenn, sem og þá sem gerðu Ísland nánast gjaldþrota.

Þetta er farið að minna mig á fræga teiknimynd, þar sem dýrin á búgarðinum gerðu uppreisn gegn bóndanum sem var hrotti, og svínin tóku svo við sem enn verri stjórnendur, þau störfuðu í skjóli grimmra hunda sem réðust að hinum dýrunum og jafnvel drápu eftir pöntun svínanna.

Skildi það enda þannig að fólkið mæti með Molokoff kokteila og baseball kylfur til að verjast þeim sem eiga að vernda fólkið, viljum við virkilega að Íslenskt fjölskyldusamfélag endi í bardaga innan fjölskyldunnar og bræðravíga, það eru yfir 40.000 skotvopn í landinu.

Er ekki komin tími á að fjarlægja ófriðarmenn, jafnt innan lögreglu sem utan, áður en stigmögnun endar í skelfingu.

Við börðumst innanlands fyrir mörg hundruð árum, að svo langur tími líði milli átaka, segir meira en mörg orð um þær hörmungar sem slíkt hefur í för með sér.

Höldum friðinn.

Engin lagaheimild fyrir handtöku

Halda ró sinni

Það verða allir að halda ró sinni, Lögreglunni ber að virða meðalhóf en halda líka uppi lögum og reglu, til þess er hún og það ber að virða.

Lögreglan verður samt að hafa vit á að egna ekki til átaka eins og hún gerði ítrekað við mótmælendur gegn virkjunum, hér er ekki verið að fást við fámennan hóp krakka.

Það virðist stundum vera stefna Lögreglu að ögra, og vera með ótímabær inngrip, ég vona að þeir sem hafi þroska til hjá báðum aðilum, hafi vit á að stilla til friðar og forðast það sem nú hefur gerst, að snúa reiðinni gegn þeim sem eiga að halda friðinn.

Ég er hræddur um að það skipti engu máli hvort Víkingasveit er til eða ekki, ef fólkið fer að vopnast olíu fylltum flöskum og öðru verra, að hætti erlendra mótmælenda.

Það virðist vera ótti við niðurskurð hjá öllum opinberum aðilum, sé verið að réttlæta hundruða miljóna kostnað við fjölgun lögreglumanna og rekstur sérsveitar, með því að beita sér gegn mótmælendum, er um illa ígrundaða ákvörðun að ræða.

Það þarf ekki mikið til þegar þráðurinn er stuttur, og oft best að halda sig á hliðarlínunni eins og hægt er, því miður er ekki hægt að bakka með handtöku mannsins, fyrst hún er búin á annað borð.

En er nú ekki rétt að tala aðeins yfir þeim innan lögreglunar, sem ákvað þessa tímasetningu.

Mótmæli við lögreglustöðina

Að stela mótmælum

Það er merkilegt að fylgjast með þátttöku hinna tækifærissinnuðum ungliðahreyfinga stjórnmálaflokkana, og ýmsum hagsmunapoturum stéttarfélaganna, reina að gera sig að forustuafli meðal mótmælenda.

Þetta fólk er farið að vinna saman að stýringu óánægjunnar í samfélaginu, sjálfu sér og flokknum til framdráttar.

Það skildi ekki vera að gerast þetta venjulega, að tungufossar stjórnmálaflokkanna enda sem sigurvegarar væntanlegra kosninga, án þess að nein endurnýjun eigi sér stað innan flokkskerfana.

Mótmælendur verða að fara að tala meira saman um væntanlegar kosningar, og það án þess að láta atvinnufólkið stýra umræðunni.

Við þurfum nýtt afl fyrir nýja tíma, afl sem sker sig frá hinum spilltu Stjórnmálaflokkum og opnar fyrir algera endurnýjun á Alþingi.

Afl sem getur hent út hinum gömlu hirðsiðum á Alþingi, og gert stofnunina að löggjafarsamkomu aftur, en ekki undirlægju Framkvæmdarvaldsins og þjónustustofnun hagsmunapotara

Áfallastjórnuninni lokið